Баянгол дүүргийн нутаг дэвсгэрт сүүлийн саруудад хүчин, дээрэм хулгай, амь нас, эрүүл мэндэд онц хэрцгийгэр халдах зэрэг гэмт хэрэг бүртгэгдэх болсонтой холбогдуулан тус дүүрэг дэх цагдаагийн газрын 2-р хэлтсээс гэмт этгээдийг илрүүлэх чиглэлээр ажилласан байна.

Гэмт хэрэг үйлдсэн байж болзошгүй 25 настай А гэгч этгээдийг олж тогтоон мөрдөн шалгалтын явцад сэжигтэн А-нь дараах гэмт хэргүүдийг үйлдсэн нь урьдчилсан байдлаар тогтоогджээ.

  • -Баянгол дүүргийн 22 дугаар хорооны нутаг дэвсгэрт иргэн А гэх эмэгтэйг 2021 оны 10 дугаар сарын 02-ны өдөр нярай хүүхдийн хамт гэртээ байхад нь хутга тулган айлган сүрдүүлж хүчиндсэн,
  • -Баянгол дүүргийн 10 дугаар хорооны нутаг дэвсгэрт 2021 оны 10 дугаар сарын 3-наас 4-нд шилжих шөнө Г гэгчтэй хамтран 15-16 насны 3 хүүхдийг айлган сүрдүүлж, гар утас эд зүйлийг нь дээрэмдсэн,
  • -Баянгол дүүргийн 8 дугаар хорооны нутаг дэвсгэрт байрлах ... дугаар байрны орцонд 2021 оны 10 дугаар сарын 04-нөөс 05-нд шилжих шөнө иргэн эмэгтэй С-ийн эрүүл мэндэд ноцтой хохирол учруулан төмрөөр зодож гар утас, цүнхийг нь дээрэмдсэн,
  • -Баянгол дүүргийн 9 дүгээр хорооны нутаг дэвсгэрээс 30 орчим, Чингэлтэй дүүргийн нутаг дэвсгэрээс 10 орчим автомашины цонхыг хагалж эд зүйл хулгайлсан үйлдлүүд тус тус тогтоогдсон байна.